منتديات منابر ثقافية - الامس واليوم

اليوم ڇنه امس والامس ڇنه اليوم
الامس شفنه الڴمر واليوم شفنه انجوم
كل هذا ما يختلف كل الوضع معلوم
بس غيبتك تختلف يالشوفتك تعلوم
صح نڴعد احنه الصبح وبالليل عدنه النوم
ونحڇي وي كل الخلڴ وتمشي الحياة لزوم
لاكن جماد انحسب واڴظي العمر محكوم
وانتظر يمته الفرج افراج لو معدوم
يوم الاشوفك فرج واعياد عندي تدوم
ويغني طير السعد
ونجوم تطلع بعد
لنك فرح للفرح والفرح منك فرع ومنك اخذ مرسوم
يالتختلف عالبشر
يالنظرتك ڇن بحر
الڴمر ضاج ورحل وبغيبتك مهظوم
الڴمر حقه اختفه
لن حبك العاصفه
وحته النجم بيه حزن ويصيح اه مالوم
كل الليالي تمر
وينڴظي تالي العمر
بس عمري ما ينحسب لو ما اشوفك دوم
ياقالبك من ذهب
يالبيك كل العجب
من طين اصل الخلق يا حكمه القيوم
ما اصبر بفرڴتك
لن افرح بشوفتك
وصدڴني بغيبتك ظيم وقهر وهموم
صح هالنعيش العمر
ويڴظي الصبح والعصر
وتالي يرد الوضع نفسه يرد كل يوم
ونرجع نحس بالوكت مثل الامس واليوم
واليوم ڇنه امس والامس هوه اليوم
بقلمي ....... مؤيد الساعدي
28/4/2013