يا ربّ
حتى في الأحلام ماليش
إلا في الحـِتّة الهباب؟!!!
حلم باغرق
حلم باندب واستغيث
أو بتلسعني عقارب
أو بتجري وراي كلاب
نفسي اشوف في أحلامي جنة
منها أشرب كوز هــــنا
نفسي أمارس كل حاجة
منها حرمتني الظروف
أحدف على الظالم حجر
أنزع الجزء اللي بيعورني
م اللي مكتوب عالجبين
أفترس كل اللي هانني
أكشف المستور
لأجل ماعرف
مين معاي؟
ومين رخصت عليه
فخانّني
أجبر المكسور
وارد معروف الحبايب
آه لو أطفئ الشوق لليلي
حتى جوا الحلم مرة
أحكم العالم
بكفي المستقيم
واملا أبدان اللي ليَّ
بالسعادة والهداية
نفسي أحقق أغلى غاية
النبي
لو في أحلامي يقابلني
بابتسامة
نفسي اشوفني في القيامة
تحت ضلِّة نور ورحمة
عايز اشوفني
غيري خالص
شخص فيه عافية ورشاد
أو مفارق أرض خوفه
يا رب
يا ال واهب الناس نعيم
نفسي أدوقه
حتى لو حلم في منام