الموضوع: قصائد شعبية رائعة لشعراء مبدعين
عرض مشاركة واحدة
قديم 06-01-2016, 01:30 PM
المشاركة 2
الصورة الرمزية حميد درويش عطية
حميد درويش عطية
من آل منابر ثقافية

اوسمتي

  • غير موجود
افتراضي
ردي .. ردي
للشاعر الكبير .... عريان السيد خلف
ردي .. ردي
ياضعن شت عن هله ، اوحدّاي
غربه .. البيه يحدي
ردّي .. ينباع العشگ .. واليا گَلب
تهوين صدّي
لا تهيجين الجروح .. اجروحي من تنلچِم
... تدّي
وانه من دم اوْ لحم .. مو من صخر
چبدة العندي
ردّي .. مليت الصبر .. وامگَاطر
الدمعه .. اعلّه خدي
وانه .. خلاني الوكت .. ناعور
بس اترس ..وبَدّي
جورت ليل الصبر . واعجزت مِنّه ..
اوْهذا حدّي
بلچِي من يغفه الجفن .. ما چِلمة
التنگَال ، بعدي
انه موش اول زند .. يشتل
شلب .. ويحصد بردي
اولانه بس اتغربت والمعتنيله ..
ايصير ضدي
ردي .. ردي
مالي حيل امعاتبچِ .. وانه العليچِ
اديت جهدي
غلّست .. عن الگَلت والگَال ..
گَمت اسمع .. واعدي ..
او صابرت صبر الطفل .. شربي الطفل
والحزن مهدي
واحملت ليل العطش .. وانه العيون
السود .. وردي
اوساهرت .. طول البعد لمّن
عشگَت اليال .. سهدي
والله چِا مل او جزع .. لو قصتي ..
اعله ايوب تسدي
ردي ..وانه .. موطبعي العتب
عالما حلاله .. ايصون عهدي
يا رخص ذاك الجدم . كون اعله ياهو
الچِان .. يبدي
او يامناحة ذلتي .. اوليل الگَضيته
ادموع وحدي
وانه .. من دم .. اولحم .. مومن
صخر چِبدة العندي
انه خلاني الوكت
ناعور
بس .. اترس وابدي
************************************************** *******************
حميد
عاشق العراق

1 - 6 - 2016

معكم ألتقي ............ بكم أرتقي