رحيم العراقي
ـ ما مشتاكَـ لا والله .. ولا حاسبكم احباب
بس حملي كسر ظهري..وإنتـّجيت عالباب..
إنفتح باب الجرح والحوش..
وباب أسراري من صدري
إعصار وجرف كل عمري
وإنفـتحـت بروحـي أبواب وأبواب..
أول ما دست.. ياحوشنه الضـيكَـ
ينازل للخصر.. كاشِيَّه مكسوره
لمن جِـنـَّه نزحف جانت إتطكَـطكَـَ
إيه ياحوش يزغيرون
يامن جان كل الكون ..
طبـّكَـناه بَلِف ياعلي.. و كل كاشِيةَّ من فد لون
لسه بحوشنه يم قاطع الدوره ..على البسمار
أوراق الكهرباء والماي والحـّراس والتليفون
والرازونه..لسّـه إمشّـرعه عالكون..
..تهب نسمات خجلانه ..تمر خطوات تعبانه..
تمرأوجوه محتركّه بسموم الصيف..
مثل كابوس لو هذيان ما بين الصحو والطيف..
صدى وأصوات حدادين..فتاحين فال..
إمجاديه .. إمخابيل..خياطين فرفوري
بياعين حصران ومكانيس.. وسِلال اثروب
و ابطون وسمج تايخ وطير الماي والزوري
وسدارة حجي عبود المضمد تخطف بسرعه
على بايسكلجية ثمانية وعشرين..
و وجه مليان جص .. إبصفحة اللوري..
و سبع نسوان يتحزمن.. ويكتمن ضحكهن..
.. زلم ..صوب الفاتحه ..يروحون...
و- ذهب ..فضه .. رحي وسنون..
وبنات المدرسه يمُــرّن ..
عطرهن والخصريلهث على الشيفون
والرازونه..لسّـه إمشـرعه عالكون..
عبر منها الضوه.. والرشِـكَـ يا ما دكّـ على الكرتون..
.لسّـه بحوشنه إمصـّلى عتيكَـ وباريه وصينية الفافون
وطيارة ورق مكَطوعه وجعاب
ودعابل ملحه وإبطالة سفن آب..
..أنا الناسي الطفوله وسافر وشاب
ورجعت البيت ..هذا البيت.. شنهو ..إشصار بي ..؟
..بس عش الغراب..
حتى الصور عالحيطان ما حفظت ملامحهه ..
إنمحت.. ذابت ..وغابت ضمن من غاب..
لكَيت بحوشنه إمرايه على الكاشي
شفت بيهه وجه محتار.. ما مفهوم ..
لا راجع ولا ماشي..
شفت عيون تعبانه وتجاعيد وبسمار وشيب وتراب..
..بعد بـيَّ محبه ..ومامش احباب
بعد بـيّ لعب..و صحابي متغربين..
لو أموات..والباقين شِيّـاب..
جِـنـّه اطفال متعلكَين بالبسمارعلى حيطان غرفتنه..
بصـوَرنه وإحنه طلاب..
بالمدرسه..بعمرأربعطعش أو دون
إبكَـهوه بشـارع السـعـدون
وإحنه شـباب
صورنه الحمره ..وإحنه أوجوه ممنوعه
وصورنه الخاكي ...وإحنه جنود
مشروره ملابسنه على الأسوار..والأسلاك مكَـطوعه
وصـَّل قمصان..فانيلات..والرايات مرفوعه..
مهزومين..مختنكَين.. مشتاكَـين.. يا أحباب
مشـتاكَـين.. نشـــتـّم الهـوى المـا هـاب
دوّخـنه الفقر والحرب يا ديلاب عيد إضحيه..
يا هـّم ..يا وكت.. يا عمر..يا ديلاب..
..ياحـوش الطفـوله الماعرفناهه
ولا شاهد علينه إيكَول عشناهه
الشمس حركَت سطحنه و..جير..
من مرزيبنه المشروم ينزل جير
ودم متخـثر بريش العصافير
على شِبّـاك غرفتنه و ستايرنه
المخـتنكَه بجكَـــايرنه
بأثر إيدي على الشباك من كنت إنتظر..و ارسم مشاوير..
بتاريخ إمتحان الهندسة والجبر مـكـتوب بطباشير
ينزل جــير
..على بصمات ورديه
بكَـشر زهدي وجنحان الصراصير
لا لوحه ولا منظر طـبيعي ولا تصـاوير
بحيطـان الغـرف.. جـير وبسامير...
__________________________________________________ _
حميد أبو ماجد
9
9
2011