شبوا النار
علوا بيت الشعر
الليلة غاب الكمر
بخروا وليدي يحب العطر
زينوا المجلس بالزهر
وليدي يحب الغوا بالعطر
وليدي يعشك الصبر
***
جانا طارش وصل خبر
وليدي جاي من السفر
أذكر إنه من شهر
دزلي رساله خط بأول سطر
وليدج يايمه فارس صكر
يايمه أوف ماأحلى السهر
حارس وصالي بحذر
محاذر من لحظة غدر
حامي بلاده من الخطر
***
بحر الشمس برد وحر
مايخشى ثلج ومطر
يكتبلي وهو يفتخر
آه والله ياأم الصبر
الظيم ما يتحمله العمر
ولاظل يمنا صبر
إي يايمه هذا الكدر
وحك طاهر حليبج
وذخر كل أم بولدها
وطهر ترابك ياوطن
رجال إحنا مانهاب المحن
صارت البارودة سلوتي
ونخوتج يايمه تزيد بهمتي
هاذي علوم وليدي
كبل وبعد السفر
حلف وليدي وتبسم
يايمه منا زغار
بنزلنا كطعنا عهد ونذر
مانام أبداً عالكهر
***
وليدي يالنشامه ياربع
وليدي الفارس البطل
مايهاب المحن
ها وصل وليدي
وسعولوا كل الدرب
ها ياوليدي محلا طلة البطل
ملفلف بيرق وطن
وليدي مات لا...؟
من جديد بسما ظهر
عالي بعلوا الكمر
وبدمه سكى ترابه
وكتب كلنا فدوى ياوطن
***
إسمه الشهيد ولي الفخر
هذا اللي انتظرته ياعمر
ربيتوا كل شبر بنذر
نادوني يالحبايب
أم الشهيد البطل
أم الشهيد البطل
أم الشهيد البطل
***
شعر
خالد الفرج